حلمي من الصغير اني اتخصص بهندسة الكمبيوتر، هالجهاز الغريب العجيب الذكي اللي سهل علينا حياتنا و صار جزء لا يجزء منها. أقول لك شيء؟ الكمبيوتر صار أهو حياتنا .. و ما نقدر نعيش من غيره بعد ما تخرجت من الثانوية، صرت لحلمي أقرب لكني صدمت بالواقع المر اللي فرضته علي بيئة غير صالحة و مهيئة لإنسان له احتياج خاص مثلي! اللي مثلي ما يقدر يتخصص باللي يبيه أو يعيش حلمه باللي يختاره قلبه. ليش يحسسونا اننا محتاجين مساعدة من الغير دايماً و ما نبي نساعد نفسنا بنفسنا؟ البنية التحتية من مواصلات و مباني مصمم بعكس ما نحتاج حتى لو حبين نروح لموقع معين أول لشيء نحس فيه هو أن هالمكان مو لأشخاص مثلنا أنا في رحلة البحث عن وطن جامع لكل فئات المجتمع دون تمييز. احنا كذوي احتياجات خاصة نحتاج ان تكون المواقع و التطبيقات الإلكترونية المستخدمة المهمة و المستخدمة في دولتنا متاحة لنا و سهلة الإستخدام و تحتوي احتياجاتنا على الرغم من اختلافها في مرة من المرات اشتهيت اني أطلب من مطعم و من مبدأ الإعتماد على النفس حبيت اسوي مثل ما أخواني يسوون إذا اشتهو ياكلون من برا البيت، اني اطلب عن طريق احد التطبيقات المخصصة لطلبات المطاعم أونلاين في الكويت، كشخص كفيف ما حسيت بارتياح و أنا أقوم بالعملية بنفسي .. من وين أبلش؟ مافي أحد بالدنيا يحب انه يكون منسي!